Նյութը՝ ԳԱԱ Գիտակրթական միջազգային կենտրոնից
Լուսանկարները՝ ԳԱԱ Գիտակրթական միջազգային կենտրոնից
Տեղադրվել է 2017-12-01 21:04
Անվճար դասընթաց տնտեսագիտությամբ հետաքրքրվողների համար
ՀՀ ԳԱԱ ԳԿՄԿ տնտեսագիտական լաբորատորիան եւ շրջանավարտների հետ կապի եւ կարիերայի բաժինը համատեղ նոյեմբերի 14-24-ը ՀՀ ԳԱԱ Գիտակրթական միջազգային կենտրոնում (ք. Երեւան, Բաղրամյան 24 դ) կազմակերպեց տասնօրյա անվճար սեմինարներ նրանց համար, ովքեր հետաքրքրված էին տնտեսագիտության ոլորտում նոր եւ պրակտիկ գիտելիքների ձեռքբերմամբ:

Տնտեսագիտության ամբիոնի վարիչ, տնտեսագիտական լաբորատորիայի ղեկավար Կարեն Սարգսյանի խոսքով՝ ծրագրի նպատակն էր աջակցել գործարար ծրագրերի (start up-երի) հիմնադրման եւ արդյունավետ կառավարման ոլորտում հետաքրքրված անձանց մասնագիտական հմտությունների զարգացմանը, տնտեսագիտության տարբեր բնագավառներում ժամանակակից տեսական ու գործնական գիտելիքների ձեռքբերմանը. «Ծրագիրը բացառիկ եւ հիանալի հնարավորություն էր արդիական տեսագործնական գիտելիքներ ստանալու, գործարար հմտությունները զարգացնելու եւ դրանք բիզնեսի տարբեր ոլորտներում գործնականորեն կիրառելու առումով: Կարծում եմ՝ ծրագիրը շարունակական կլինի: 

Ծրագրին կարող են մասնակցել տնտեսագիտության տարրական գիտելիքների տիրապետող այն անձինք (առանց մասնագիտական սահմանափակման), ովքեր ցանկություն ունեն հիմնադրել ու զարգացնել սեփական բիզնեսը եւ իրենց բիզնես գաղափարների իրականացման համար փնտրում են համապատասխան հնարավորություններ, ինչպես նաեւ հետաքրքրված են ժամանակակից բիզնեսի արդյունավետ կառավարման գործընթացներով»: 

Ծրագրի ավարտին բոլոր մասնակիցները ստացան հավաստագրեր: