Բաքվի փոխարեն` Կազան
Տեղադրվել է 27-07-2010
Շախմատի հավակնորդների մրցաշարը Բաքվից տեղափոխվեց Կազան:
Բանն այն է, որ օրեր առաջ Ռուսաստանի շախմատի ֆեդերացիան մրցաշարի վայրը փոխելու խնդրանքով դիմել էր ՖԻԴԵ-ին, քանի որ Լեւոն Արոնյանը բազմիցս նշել էր, որ ինքը երբեք հանդես չի գա Բաքվում: Եւ ՖԻԴԵ-ի նախագահական խորհուրդը մրցաշարը Կազան տեղափոխելու վերաբերյալ որոշում է կայացրել:
Հիշեցնենք, որ 2011 թվականին կայանալիք հավակնորդների մրցաշարին մասնակցելու իրավունք են ստացել Լեւոն Արոնյանը (Հայաստան), Թեմուր Ռաջաբովը, Շաքիրյար Մամեդյարովը (2-ն էլ` Ադրբեջան), Վլադիմիր Կրամնիկը (Ռուսաստան), Մագնուս Կարլսենը (Նորվեգիա), Վեսելին Տոպալովը (Բուլղարիա), Բորիս Գելֆանդը (Իսրայել) եւ Գատա Կամսկին (ԱՄՆ):
Ըստ ադրբեջանական մի շարք ԶԼՄ-ների` Ադրբեջանի շախմատի ֆեդերացիան էլ իր հերթին պատրաստվում է բողոքարկել ՖԻԴԵ-ի այդ որոշումը:
Գոռ Ավագյան